qhia khi tes

Qhia khi tes ua plig

    Kev khi tes ua plig rau ib leej twg rws li nyob rau peb sab teb chaw thiab yus pom yus niam yus txiv lawv ib txawm coj los nws muaj 4 theem raws li hauv qab no (tej zawm yuav tsis thooj li nyob rau nej sab naw) 1. Cheb 2. Tav 3. Khi tes 4. Txiav hlua     Yog li no caw peb sawv daws los mus kawm seb cov lus nyob rau tawm 4 theem no ho hais li cas thiab ho pua hais li nyob rau nej sab teb chaw

Ua ntej cheb

    Txawm si hnub no zoo hnub, hmo no zoo hmo, hnub no yog hnub dawb hmob no yog hmo huv, txawm sis kuv muaj cuaj tug txwj yim tug laus , cuaj tug hauv teb yim tug hauv chaw tuaj pab txhawb pab nrees (nrau tus yus khi tes lub npe) no ntsuj duabntsuj plig no lau

1. Cheb

    Txawm sis kuv cheb no kuv tsis cheb (rau tus yus khi tes lub npe) plig niam plig txiv plig tub plig kiv, tsis cheb nws no plig nyiaj plig kub, plig qoob plig loo lau, Kuv cheb no kuv tsuas cheb (rau tus yus khi tes lub npe) nws cuaj txoj sab mob yim txoj sab nkeeg , kuv cheb vij sub vij sw vij dub vij npog, cheb sub tawg sub ntsha, kuv cheb hleb rag hleb rawg zaj mob zaj nkeeg, kev cheb nws kaum ob haiv mob kaum ob haiv nkeeg cheb mus rau cua tshuab dej tshoob lawm puag hnub coog hli kawg kom ntsej tsis hnov muag tsis pom no lau!

2. Tav

    Txawm si kuv tav no, kuv tsis tav (rau tus yus khi tes lub npe) nws kaum ob haiv mob kaum ob haiv nkeeg, kuv tav no, kuv tav (rau tus yus khi tes lub npe) nws me ntsuj duab ntsuj hlau me koob me hmoov me plig nyiaj plig kub los nrog niam nrog txiv, nrog viv nrog ncau, nrog kwv nrog tij los nrog ncej cub sib puag ntub los nrog ncej taws sib puag pw los nyob niaj txhiab tsis muaj niaj txhis tsis muaj nkeeg no os

3. Khi tes

    Txawm si hnub no zoo hnub, hmo no zoo hmo, hnub no yog hnub dawb, hmo no yog hmo huv, kuv khi no, kuv tsis khi (rau tus yus khi tes lub npe) los nrog niam nrog txiv los nrog kwv nrog tij nrog viv nrog ncaus, txawm si khi kom nws los muaj dag muaj zog, noj mov kom poob plab hau dej kom poob cev, txawm sis kuv khi peb txheej hluas ntswj, kuv khi kom los nyob dawb hau nres cauj cuaj ua xeev txwj. Kuv khi peb tis hluas rhaus. Kom nws los nyob daj txoob ciaj ua luag xeev laus. Txawm sis os kuv khi (rau tus yus khi lub npe) nws los nyob hauj vam xwb xub ntab nroo ntws xwb xub muv, nws mus laj fab tsis pub kom nphav sab mob, mus toob fab tsis pub kom nphav sab nkeeg, kuv khi nws kom nce toj los zog loj kom nqes hav los zog nchav, kuv khi los ua ntuj tub ntuj kis los nyob ntsej tshiab khub muag ntshiab khiv , kuv khi nws los nyob dawb hau li paug niaj txhiab tsis muaj mob puas xyoo tsis muaj nkeeg no os

4. Txiav hlua

    Txawm sis kuv txiav no kuv tsis txiav nws plig niam plig txiv pliag tub plig kiv, kuv tsua txiv nws cuaj tsa sab mob yim tsav sab nkeeg, txiav nws kev txheej puaj vam xwb txheej rau hluav taw kub, rau cua tshuab lawm puag hnub coog hli kawg kom ntsej tsis hnov muag tsis pom lau